(精神科 - 重抑鬱症､焦慮症､驚恐症､糖尿病､皮膚病…)
(長文！或有洋蔥！慎入！)
一位介紹本站主認識匡信中醫的病友，一個本站主追蹤了很長時間的個案，得到病友及其家人同意分享當中經歷，為表尊重及保護病友私隱，以P 病友尊稱。
主角病友：P病友 (P for Patient)
主診醫師：何卓科醫師
黃智偉醫師
就診診所：匡信中醫專科診所
盈柏中醫診所
這是一個未完的故事，由P病友遇到何卓科醫師，同何醫師講：「我好辛苦，我好想做番個正常人，可唔可以幫下我！」開始...
P病友好細個果陣，大約讀初中既時候吧，開始發病，確診抑鬱症。當時由兒童精神科跟進。當時遇到既精神科醫生同心理學家都將病情控制得幾好。
P病友本來係一個好努力讀書的孩子，成續幾好架，唔知係因為家庭問題還是學業壓力，患上抑鬱症之後，好想繼續做好，但奈何係抑鬱症之下，總是力不從心，每件事情都做唔好，無緣升上大學。長大了，被轉介至成人精神科跟進。
中學畢業後本來有一份幾好既會計工作，遇到一個年青好老細，體諒P病友的患病情況，唔介意P病友上班時間覆診，容許P病友彈性時間上班，並鼓勵P病友業餘進修。唔知當時個老細係咪太好人啦，上天係呢位老細一次患病中藉著并發症帶左佢上天堂享福。之後就換左一個同樣食緊精神科藥物既惡魔老細，唔比P病友上班時間覆診，連P病友發緊燒102度都要迫P病友返工，係呢d咁恐怖既惡魔老細既魔掌之下，P病友病情惡化，捱唔住要辭職。
好老細真係可遇不可求，P病友之後到現在，都再遇唔番咁好既老細。病情差左，有好多野都更加力不從心。之後無份工做得長，失業､炒散､社福機構的活動助理､保安（當時保安行業係12小時制，長時間站立同揹住好重既裝備，對P病友既骨已經造成損傷，並弄至P病一身肌肉勞損，五勞七傷。），夾硬捱左一段時間因被上司歧視同唔比上班時間覆診而辭職。有好長既一段時間失業。呢個世界就係咁，一沉百踩，因為失業無錢拎返屋企比屋企人睇唔起，甚至不時有埋怨既說話比P病友聽；又唔知點解呢個世界又有好多八公八婆，親戚啦，三姑六婆啦，街坊啦，見到P病友總愛指指點點，係背口話P病友無鬼用，成日係屋企唔返工，唔識搵錢，有d仲搞笑到以為自己年紀大d就係長輩，一見到P病友就問直接問P病友到底有無野做架，成日呢埋屋企唔返工呀。呢d種種，令P病友覺得呢個世界無希望，佢唔知自己點解會黎度呢個世界，唔知點解要生存。久而久之，出現自殘行為，用傷害自己身體得到既痛楚黎遮蓋心靈既創傷，怎至萌生自殺念頭，曾經係街遊盪想自殺被警察截到，聯絡家人帶佢返屋企。其實理性d睇，呢d係一個惡性巡環，家人會覺得P 病友麻鬼煩，P病友又會覺得家人唔了解唔體諒，仲要接受社會上歧視眼光指指點點，病情只會更惡化。
本站主都覺得P病友既遭遇好不幸，屋企人唔理佢，當時唔知乜人叫佢睇私人執業輔導員，有個鐘係度一夠鐘就叫你比錢果d，仲成日要揾佢d屋企人叫佢d屋企人比錢一齊傾，令佢d屋企人好反感。但我都完全理解唔到點解個輔導員會介紹私家精神科醫生比自己個client，私家精神科為左控制得住P病友病情，優惠價開左勁大量精神科藥物比P病友，食到P病友呆呆濟濟，教P病友盡情去玩黎忘記唔開心既野，唔想返工就唔好返，自己開心最緊要。但係……佢咁既樣，咪令到佢d屋企人仲唔鍾意佢，覺得佢好麻煩，淨係識洗錢唔識搵錢，最後，連個懶好人既精神科醫生都放棄佢，P病友受到既打激更大，對人更加唔信任，覺得個個人都想出賣佢。到底呢個世界仲有無道德呢樣野架！
兜兜轉轉，P病友又返政府精神科，好彩既係，佢既主診醫生從來無放棄佢，盡力觀察住情況，幫佢重返社會。
之後有對P病友好重要既親人離世，就因為P病友有重抑鬱，當時佢d親人驚佢發作及崩潰，做左一件本站主認為好錯既事，就係如果P病友流眼淚，就唔准去醫院見就要離開既親人，一見眼淚就趕P病友出病房門口，一d都唔人道，根本就係因無知而做壞事。當時P病友為左見親人最後幾面，更加抑壓自己既情緒，從此唔比自己流一滴眼淚，咁樣好恐怖，壓抑住既情緒釋放唔到令病情更加嚴重。
P病友既情況對外人黎講其實唔可怕，佢唔會傷害其他人，只會不停將自我價值扁低，嚴重缺乏自信，自己鬧自己廢柴，唔死都無用，留係世上累人累物，情緒波動緊要既時候打牆打到手損，用刀介自己，透過自殘傷害自己身體黎發洩。
本站主之所以咁嬲，就係自己都做過傻事，以前陪住有絕症既屋企人都有尋找中西神醫的故事囉。親戚朋友話邊到有神醫都去試，突然好多人話比你知原來有好多神醫，做生意d有錢佬睇邊個神醫，好貴都試，山長水遠去國內搵都有。哈哈，咁就更係搵唔到神醫啦。係尋找神醫的路途上，我都有幫P病友問過其他d醫師抑鬱症有無得醫架，就連教授級醫師都話有架，中醫有一科叫"鬱結病"，仲比埋教科書我睇添，但要加句，咪帶佢黎醫下囉，無話一定醫到架，多數都醫唔到。見得多都識懷疑有伏啦，做得傻仔多都會變精啦，咁就更係無帶P病友去啦。
真係架，唔係講笑，個天未要你上天堂，想死都死唔去架。咁點呀，係P 病友又唔知自己生存黎做乜，繼續自殘，遊遊盪盪消秏生命，無目的地行，又好似天意有安排咁，無啦啦發現左有一間匡信中醫專科診所，鼓起勇氣行入去，遇到何卓科醫師，之後再遇到黃智偉醫師。
係P 病友遇到匡信既時候，已經係一個確診左差唔多廿年既抑鬱症患者，屬於重症，日服超過三十粒精神科藥物，夜晚長期失眠已去到精神科醫生醫生處方4粒俗稱 "藍精靈" 既安眠藥；驚恐，焦慮至經常緊張得不能面對人群，出汗，手震；長期受頭痛折磨，全身都有痛症，忍痛能力都超乎於常人；糖尿病已嚴重到要針藥每日三次注射三十幾度胰島素；皮膚容易出現痕癢潰爛難好，需要長期使用類固醇；心臟又成日好大力咁跳動，手震、無記性係家常便飯。試過一年都無月經，就算有都係四個月或半年一之黎少少咁。醫院一直有定時幫P病友做檢查，當然心電圗、腦素描、磁力共震之類既檢查結果都係正常啦。除精神科外，P病友亦係內科、眼科、皮膚科、骨科既常客。我真心唔明，亦想像唔到，一個人點解可以有咁多病，d 日字到抵點捱！
唔知道何醫師遇到P病友會唔會好頭痛，但佢堅係一個真心想幫到人既好醫師。初期P病友情況唔係幾理想，何醫師因應情況有特別既安排。P病友今次真係感到中醫對佢有幫助，雖然初期只有好輕微好輕微既改善，但信心已經建立，會唔會係一個好既轉淚點，可以再起步呢？
人有左信心，辛苦程度降低左dd，P病友又再去尋找新工作。P 病友份人好單純，佢見每一份工都都坦白話比僱主知佢有抑鬱症，要覆診的。咁傻豬，就更係失敗既多啦，咁都唔緊要，佢好有毅力的，終於比佢搵到一份長期合約工，一份要輪班勞動力極高既工，咁……肢體既勞損就更加嚴重啦。不過呢份工，雖然辛苦，亦有同事歧視佢成日覆診，蝦得就蝦，都唔緊要，佢都識到一班無歧視佢既同事，當中有癌症康復者，有高學歷但長期失業，有家庭經濟壓力，所以要黎做苦力，每個人背後都有自己的故事。佢地互相鼓勵，一齊頂硬上，原來咁樣都會有動力，個個都努力搵穩定既長工。
搵到長期合約工 ，何醫師的開診時間又有改變，難夾到，要再找另一位醫師幫忙。精神科､情緒科病患，真係唔係個個醫師都應付得到，遇到無品無醫德既，真係會傷害到個病人架。好好彩比佢遇到黃智偉醫師，聽過有街坊話黃醫師好有耐性好細心，就試下啦，乜……乜……個樣咁後生既？嗱～嗱～自己唔想被歧視，咁自己都唔可以歧視醫師個樣生得後生架。有能力醫、真心醫到人咪得囉，醫師個樣後唔後生關我地鬼事咩！
對情緒問題有少少了解既都知道，如果醫生同病人建立唔到互信基楚，係幫唔到的。對於精神科既病人黎講，尤其遇過唔少庸醫既P 病友，對醫護人員既信任係好難建立的。但何卓科醫師及黃智偉醫師做得到。P病友覺得呢兩位醫師真的好可靠。呢兩位醫師，好真誠的對待病人。雖然佢地係中醫師，但以P病友既情況黎講，都建議P病友要繼續精神科治療。P病友都曾經好奇地問過兩位醫師，淨靠中醫得唔得呢？醫師都話唔建議。中醫係可以醫，但同時都要睇好多因素，例如中醫係醫治精神科方面，有幾多臨床數據可以比到病人參考，可以令病人有信心只靠中醫治療呢？又因應病人既情況，病人實實在在感到好辛苦唔舒服，例如唔知成因既頭痛，驚慌，失眠，用中藥既話需要長時間調理，要病人長時間咁忍受係咪就叫對病人好呢？現實既社會環境，病人要返工，係咪由得長期失眠慢慢醫叫病人好？治病要以治急病為先，要先處理最急既情況，其後再調理。藥物幫助實在發到出黎既病痛，但內心既傷痛就要接受心理治療。仲要睇埋病人既合作性呢。唔係乜都講理想架，何醫師同黃醫師都係好實際地為病人切想的。仲要收費唔貴，係平民負擔到既水平。呢兩位醫師個心總為病人切想，佢地之間不存在生意上惡性競爭，唔會推銷或叫人買產品，仲間唔中會提下你，睇醫生好貴架，自己都要注意飲食，做下運動幫自己健康d呀。
而接受中醫治療後既P病友，又有咩變化呢？
現在的P病友，整體上比以前精神。已經戒掉安眠藥（連藍精靈都戒都真係好勁），瞓到，唯睡眠素質仍在改善中。已不用再日服超過卅粒精神科藥物，已控制在十粒以下。經過九個月驗血結果，確定糖尿指數正常，不用再打胰島素（我都係而家先知原來糖尿病可以好番架喎）。不用再到內科覆診。雖然長期服藥，但肝功能正常。已經再無做d自殘行為傷害自己。情緒大幅波動既情況已經無乜，人都變得比教平和。三日唔埋兩日就傷風感冒既情況無左，鼻敏感都無埋。皮膚靚左。月經已經正常番，仲係個個準時同經量正常添呀。雖然長期食藥，定期檢查肝功能正常。肌肉同筋骨勞損有醫師幫佢針灸，已經舒緩好多，無再痛到瞓唔到，行路都無再歪黎歪斜啦。當然就繼續接受精神科及心理治療，仲遇到好醫生及好的臨床心理學家啦。已經三年無再出入醫院啦。
P病友仲搵到一份穩定既長工，半文職半勞動，見工時僱主話佢談吐得體，對答如流，希望佢有左呢位穩定既工作之後，個病會好得番。但就有一個比較長既試用期。呢個世界唔會咁完美，試用期間，當然會遇到錯折，亦曾因工傷跌倒行唔到，幸好有何醫師及黃醫師幫佢跌打針灸治療，令佢可以盡快重返工作剛位。話唔驚過唔到試用期就厄人既，呢d都係心理壓力黎架嘛，好彩有呢兩位醫師係度，P病友個心真係定好多。結果就更係做到長工啦。
兩位醫師都話P病友身體好虛。黃醫師話現階段希望透過提升P病友既體質，使其他情況都有好轉。唔知佢地點醫架呢，好多麻鬼煩既症狀都消失左。我睇住P病友就食勁多精神科藥物減到而家食咁少，過程就好似戒毒咁架，有好長既一段時間會出現不安，仲有好多莫名其妙既痛症，仲成日好似癮起咁心思思想食番多d藥，令人好難過的。好彩有何醫師同黃醫師用藥同針灸幫佢，終於捱得過。精神科醫生話P病友既情況再穩定d就可以繼續再減藥。P病友話佢自己感覺到食左中藥之後而家整體體質提升左好多，知道中藥真係幫到佢提升體質架。P病友身體狀況許何時，都有去一d社福機構參與義工活動呢。
我真係好感動。呢個故事好難寫，因為帶住感動寫自己都要平復情緒。再令我反思到底乜野叫好番？係精神科呢個範疇，係咪唔洗食藥就叫好番？咁當然唔係啦。一個長期服用大量精神科藥物既人，一個近乎被社會被世界遺棄既人，一個不停鬧自己廢柴，累人累物，唔死無用既人，可以爬番起身，除左佢自己意志同努力，一眾醫護人員都幫左佢好多。而中醫治療佔左好重要既部份，好多野都係遇到何醫師同黃醫師之後先見到明顯既好轉。兩位醫師都話，佢地做到既只係輔助，進步及好既轉變都要有好多因素配合，最重要都係靠病人自己本身意志，心理素質如何。呢兩位醫師就係度，有需要既時候去搵佢地一定會幫，P病友可以安心努力地再行得更穩。
成日聽到有人話幸福唔係必然。然而，擁有平凡簡單既生活都唔係必然。P病友只想做一個普普通通既人都咁難，人到中年先可以企番起身做番一個人，先可以融入番社會做番一個人，好艱難咁爬起身，好艱難一步一步咁行。P病友感激何卓科醫師及黃智偉醫師幫左佢咁多；無嫌佢麻煩、無嫌佢症狀飄忽放棄唔醫佢；亦好包容同忍耐佢有時情緒唔好脾氣差。佢會好努力咁慢慢行，縱使漫長既前路或許並不干坦，或許仲有好障礙等住佢，希望有一日會比你地見到佢可以自己行得好穩固。
唔知你地信唔信呢，只要有少少好轉，就會越黎越好。或許正能量暫時唔夠負能量打，但儲下儲下就會儲到好多正能量，到時負能量就無訂企架啦。
香港人生活節奏急速，社會環境變化，生活壓力好大，精神病患既趨勢好似越黎越嚴重。上網search一下，就發現每年有大約21萬人要到醫管局精轄下神科專科覆診，呢個數字仲未包括向私家精神科、家庭醫生救助，以及唔去求醫既隱性精神病患者。仲聽過話有調查發現每7個香港人就有1個有情緒問題。話就話學歷水平提高左，但總係有勁多人帶有色眼鏡去睇向精神科求醫既病人。如果真係發現自己情緒出現左問題但又唔想比人知又唔肯去睇精神科，我建議試下搵中醫幫下手，雖然係無大量臨床數據支持，但我堅信中醫真係幫得到。
何卓科醫師、黃智偉醫師，我唔知道你地會唔會睇到呢個故事，P病友有野想同你地講，呢d野佢唔會開口講架啦，你地有緣睇到既話自己睇啦，應該得你地先會睇得明：
「古木，來自粗壯既大樹樹幹，就好似你地咁穩健，咁可靠。古木上或許有樹洞，都係天然而成，就好似你地咁樣，簡簡單單的用心醫人，係咁就係咁，不花巧、不作狀、不做作。手製，就好似你地咁，雖然都係咁可靠咁有醫德，但你地並唔一樣，都係獨一無二的。亦中亦英，真係見過你地用中醫醫講英文果d外國人嘛。又正經又搞笑，咪好似你地咁囉，年青實幹，一本正經咁醫人，但又唔會板著臉同病人講野，好親切丫。」
題外話，我留意到匡信（華明）診所有一位叫田皓瑤醫師，我唔識佢都唔知佢乜野樣，佢之前係安定診所駐診既時侯，我聽朋友提過對佢幾好印象，朋友都唔識佢都唔係搵佢醫，只係去睇醫生既時侯見到佢氹小朋友好有耐性好溫柔。到係樂富既時侯又聽到有人話佢教煲養生湯好叻。到而家係粉嶺，又聽到有人話佢醫小朋友情緒問題勁有耐性觀察同調藥。講明先，我都係聽返黎架咋，但再睇番資料，佢有社會科學碩士（青年輔導學）資格。即係咁，學歷、涵頭既野，對病人黎講都無意義既，我地淨係會關注個醫者有無心、可唔可靠、幫唔幫到我地架咋。但唔知點解就係聽到d 人（絕對唔係三姑六婆黎架）對佢comment唔錯，唔知佢用中醫醫情緒問題係咪都好叻架呢？唔好誤會呀，叻既意思係真心醫人又幫到人咁解咋。
如果有興趣了解一下精神或情緒問題的一些小知識，介紹你地睇一個做得幾好既Facebook專頁，由一班有心人設立的：
StoryTaler說書人Facebook專頁
https://www.facebook.com/storytaler.hk/
如果有時間，介紹你地聽下一位好熱心推動關懷康復者既已故游秀慧女士（前新生精神康復會行政總裁）生前的一個訪問。佢推動既一個慨念好好：「復原」既意思唔係重反過去，係「恢復元氣，從頭開始」的意思。
https://soooradio.net/ep/winterwarmth01/
盈柏（晴朗）診所出面影既晴朗的的藍天。
祝願每一位朋友既內心都擁有一片廣闊晴朗的天。
~^_^~
［編者寫於2018年1月18日］
補充：
呢兩日同朋友傾開偈，講起有時係公司遇到d奇奇怪怪既同事，朋友就會話人地痴線兼精神有問題，好多人有精神病。
好多時去睇精神科既病人會被誤解，被歧視。我突然想起P病友，佢唔算痴線，都唔算精神病吖，只係情緒出現問題有需要睇精神科姐，周身病佢都唔想架。
突然想起一件我覺得幾特別既事，就係P病友以前食勁多藥果段時期，係驚恐症發作既時候，會出現一種P病友話叫Panic Attacks 既情況，有時會全身疆硬唔郁得，有時會嘔，不過只係嘔d 水出黎，我只見過P 病友全身疆硬企係度彎住腰定左格咁一次，唔了解都會覺得幾恐怖。我問番P病友而家仲有無咁，P病友話呢d情況已經好耐無出現過，配合埋中醫治療之後，身體慢慢提升番到而家都未有再出現。P病友笑言，應該以後都唔會出現架啦！
［補充於2018年5月19日］
沒有留言:
張貼留言