開心搞笑診症室 - 戴頸巾

原來今日係中國廿四節氣既"小寒"，天文台又話下周氣溫再降低，下星期二新界地區仲可能跌至低過十度添呀！咁又想起一個搞笑的診症室故事……

P：病友仔（痛症慣犯）
陳：陳家祺醫師

某個夏天……
（係夏天呀，好熱既夏天）

陳：你好，有乜野唔舒服呀？

P：醫師，我肩頸位好痛，兩晚痛醒瞓唔到呀！（講到七情上面，眼泛淚光）

陳：檢查一下……應該係肌肉太緊，一陣幫你針灸

P：哎呀，真係好痛架（繼續七情上面），可能會痛死架，仲好奇怪架，肩頸個位成日涼涼地架。

陳：你係咪成日比個肩頸位吹到風呀？

P：哎呀，你講起又好似係，我返工坐係風口位，d冷氣風吹住我呀。

陳：可唔可以調位坐或關細d冷氣呀，你痛緊唔好比條頸吹風呀。

P：咁又唔得喎，唔係我話事架喎，間公司仲有其他同事要涼冷氣架喎。

陳：咁你要諗下辦法啦，盡量唔好比條頸吹風，例如戴番條頸巾保護自己條頸啦。

P：O 左咀……陳……醫……師……而家係夏天呀，你……知唔知……咁熱既夏天……戴頸巾咁核突咁突出，會比人笑架？

陳：（應該就快比P 激死）咁……你想幫到自己唔痛定係驚比人笑呀？戴頸巾好核突咩？我話戴頸巾都唔知幾靚呀，唔載頸巾咪用絲巾都得架，fashion 黎架。Fashion！ You know ？而家去治療室幫你針灸止痛先啦。
……

故事發展，就梗係針灸止左痛瞓番覺好架啦！病友仔仲同佢d 朋友仔傾開偈，話個醫師唔知係咪傻既，叫人戴頸巾。點知比朋友仔鬧番轉頭，人地醫師咁好幫你諗辦法保護條頸唔洗成日痛呀。我公司坐風口位下面個女同事日日用條絲巾包埋個頭添啦。

哈哈哈！I know 呀！Fashion 由我創吖嘛！哈哈！呢間診所d 醫師係咪好得意呢！好多都好好人好有耐性好有人情味架，最緊要係有醫德吖嘛。我搵開果d就唔使講梗係超好架啦。佢地都話頸要保護住唔好吹到風，有需要係屋企最好就熱敷下，都可以舒緩到痛症架，仲要留意下要改善自己d不良姿勢架。

下星期會涷啦，敬請各街坊病友們記得要好好保暖呀。醫師們及助護姐姐們你地都要好好保暖呀！

而家冬天啦，戴頸巾唔會比人笑架！無知既人更加唔洗理佢啦！

註：
此乃一病友仔因痛症而求診時的對話部份內容改編。

強調：
改編黎架，搞笑下丫嘛！我知陳家祺醫師都係其中一個對病人好好既醫師黎架！佢應該都好樂意提醒下各街坊病友注意保暖既。嘻嘻！