有感而發 - 星期日及公眾假期睇中醫

今時今日，無論係中醫或西醫診所，絕大大部份都係星期日及公眾假期休息，政府公立門診都係全部休息。咁...真係咁唔好彩就係公眾假期病左點算呀？咁你咪當自己運濟，一係就通街搵下有無醫生開診囉，唔舒服起上黎求其是旦都要醫架啦；一係就用最簡單直接既方法：去急症室。不過咁，個個去親急症室都話自己勁唔舒服架啦，要等幾耐先等到你比個醫生望一眼咁多喇喎，自己諗啦，等得你就等啦。

好好彩，香港有一間中醫診所叫 "匡信中醫專科診所"，盡量安排醫師係星期日開診，目的係為一班平時返工忙得要命，有病都要等到星期日先有時間求診既街坊病友服務（呢d係創辦人話我知的）。星期日開診既診所同醫師有：樂富診所的林達興醫師（呢個係好醫師黎既）；富榮診所的潘仲恆醫師（呢個唔識）；富昌診所的黃智偉醫師（呢個係好努力好細心好有心機診症既好醫師黎既）；尚德診所的江永南醫師（呢個唔識）；安定診所的文婉華醫師（呢個都係唔識）。呢啲都係調查番黎的，唔知有無漏架。不過一樣都係咁多謝呢班係星期日開診既醫師！至於公眾假期呢，就每次安排都唔同既。

咁啱...呢個世界d野就真係咁啱既...尋日中秋節假期，一早起身就整親，痛到唔動得，即刻瞓番上床攤左係度，唔掂，攤係度唔動都痛到飛起不能動，個腦淨係諗，洗唔洗打三條九去急症室，今次會唔會變殘廢。人就係咁架啦，驚起上黎呢兩個問題就係個腦無限loop，救命，驚到瞓係度都瞓唔著。

好彩，醒起有超級好醫師何醫師尋日開診，慢慢起到身就去搵何醫師打救啦。一見到何醫師個樣，心就定左一半，何醫師就係咁，淡淡定咁款，輕苗淡寫話唔洗驚，針灸之後就會鬆番d架啦。咁...事實上針灸完之後真係鬆番d，梗係唔洗驚啦，哈哈。安落晒，雖然仲有d痛痛地，尋晚真係大覺瞓，一覺瞓天光。

即係呢，今時今日既急症室，都唔多似係比d真係急症既病人用，好多人肚痛傷風咳都走去急症室，等得耐細菌多環境惡劣都不在話下，食飽細菌之後有無專科醫生出黎幫你先係問題，一個唔覺意急症室醫生扔你上病房等到假期完專科醫生返黎先睇係仲大鑊，有得選擇我真係唔想去急症室。

已經係第二次，係自己好驚唔知洗唔洗入急症室既時候遇到好有料既何醫師咁啱有開診打救，呢d咪叫不幸中的大幸囉，即係都叫有運。嘻嘻！謝謝何卓科醫師！

話時話，香港地，話就話標準工時，講同現實係兩樣野黎既，總有好多人平時要返工返到收唔到工，有病都要等假期先有醫生睇。所以呢，有料又肯公眾假期開診既醫師真係好偉大...！肯幫手開診既醫護人員都係咁偉大吖...！