我有一個心形檸檬，切開一片片心形，好靚。
望住一片片心形，突然想起你地對街坊病友們既關心，愛心，真正想幫人的一顆顆真心。
仲有……我……被深深感動的一顆心。
我知道你地為左幫到更多人，尤其好多學生及上班族要放左學放左工先睇醫生，所以就算工時有點長，有時為左要睇埋d 症而遲收工，甚至假期都願意開診，都無埋怨。
除了工作以外，你們一班醫師，部份助護姐姐，後勤職員還會進修，增值自己，為我地一班街坊病友提供優質及專業既中醫服務。
或許你們有時會感到疲累，或許有時會因為中醫呢行係香港呢個奇怪既社會發展未係好理想而感到沮喪，你地仍默默緊守自己的崗位，緊記著想自己當日入行就係想幫人的一顆心，仍然堅持住自己既專業幫助一眾街坊病友。很令人感動的。
好想話比你地知，你地係診所入面，無論係中醫師，推拿師，助護姐姐，後勤職員，你地每一位代表住自己崗位既專業，係專業黎架，就因為你地咁多人默默緊守自己既專業，不同區份既街坊病友先會得到優質既中醫服務。
我真係好鍾意你地呢一個團隊，你地願意留守係屋邨開設既中醫診所提供專業得黎收費唔貴既中醫服務，我地一眾貧苦大眾先會睇得起醫生，有慢性病的，有長期抗爭的，有返工返到勞損要長期針灸的，有奇奇怪怪的奇難雜症的。我見過一個又一個既個案，有康復的，有長期作戰中的，有因為得到你地既鼓勵而撐下來的……你地所醫既，唔止係病既本身，仲會支持埋病友既心，支持埋長期病患者既照顧者。
相信好多人都明白，長期病患者通常都會被嫌棄的，都一樣會被親人嫌棄，唔係古代又點會有句"久病床前無孝子"吖。我甚至見過有家庭因為一個家庭成員有病，其他家庭成員當照顧者經已筋疲力歇得好累好累，講 d 嫌棄病者既說話，令病者傷心得產生輕生念頭。傷心既係自己家人嫌棄自己，之後就會胡思亂想，自己唔知患左咩怪病，點解睇咁多醫生都醫唔好。的始終都係果句，遇唔到有醫德既好醫師，用幾錢都醫都無用。我見過有醫師醫人係醫埋個家庭，除左病者本身之外，願意抽時間同病者屋企人傾，安撫埋照顧者繼續支持患病家人，最後病醫好左，救番一個家庭。
知道既故事不能全部寫晒出黎，有d 病友會介意唔寫得。我都識唔晒你地所有醫師，推拿師，助護姐姐，後勤職員。有d 我見過你地，但你地唔知我係邊個，有d就係街坊朋友口中聽到而認識的。但我相信你地仍然留係度既每一位都係非常優秀的，係不同區域既診所幫助緊不同既街坊病友，因為呢一個團隊有一個非常值得信任既領導者帶領住。
中醫真係好神奇既，令我見到由沒可能變做可能，可以創造無限既可能。真係會有奇跡架！
真心的感謝你地每一位！你地既進步與發展，都係我人生路上既一個鼓勵黎架！
即係咁……心形檸檬我得一個，你地有咁多位專業人士唔夠分，請唔到你地食喇，我自己食左佢啦。就送幾張相比你地啦。好多心心呀！哈哈！
一位匡信中醫的小粉絲上
2019年5月26日
